Planta vikunnar – Button fern

Þá er komið að næstu plöntu í planta vikunnar hjá mér. Ég er búin að vera mjög hrifin af því að kaupa mér litlar plöntur núna og heillast ég mikið af burknum. Móðir mín átti afar stóran og fallegan Boston fern burkna þegar ég var lítil. En ég hef verið að taka eftir nýjum tegundum af honum, já allavega nýjum fyrir mér þar sem ég hef ekki pælt mikið í þessari plöntu fyrr en núna nýlega.

Button fern, Maidenhair fern og Lemon button fern eru í uppáhaldi. Málið með Maidenhair fern er að það er svakalega erfitt að þóknast honum, heimtar vatn í sífellu og svo má helst ekki strjúka blöðin á honum því fita af fingrum manns getur skemmt blöðin. Hún er líka ekki kölluð diva of all houseplants fyrir ekki neitt. Ég hef keypt þrjár litlar Maidenhair fern og allar bregðast þær mér já eða ég þeim. en hún er ákaflega falleg, með fíngerð blöð sem minna á blúndu.

Maidenhair fern plantan mín

Lemon button fern er svo næsti burkni sem mér finnst ákaflega fallegur og fjárfesti ég í einum um daginn.
Hann er ákaflega lítill og fallegur en á eftir að stækka töluvert.

Lemon button fern sem ég keypti í Blómaval um daginn.

Svo er það Button fern sem ég ætla að taka fyrir hér að neðan, en hana sá ég fyrst á ferðalagi um Danmörku.
Mér til mikillar ánægju sá ég hann svo og alla þessa hér að ofan í Blómaval um daginn.

Button fern plantan mín

En hvernig er best að hugsa um þessar plöntur?

Tegund: Button fern öðru nafni The Pallaea rotundifolia á rætur sínar að rekja til Nýja sjálands og vex hún þar yfirleitt milli kletta í skógum. Þú þekkir hana á hringlaga leðurkenndum blöðum. Þegar þú fjárfestir í Button fern þá getur hún verið voðalega picky í fyrstu. Og það getur vissulega tekið smá tíma að finna út hversu mikla umönnun hún vill. En þegar þú hefur fundið út hversu oft hún vill vatn og hvar henni finnst best að vera þá á hún eftir að vera aðalsstjarnan á heimilinu.

Birta: Hún nýtur sín best í smá birtu en þolir einnig að vera á dimmum stað einsog t.d inni á baði.
Passa skal að hafa ekki button fern í sterku beinu sólarljósi.

Staðsetning: Button fern nýtur sín í hillu, á borði og sumir hafa sett hana í hangandi pott.

Vökvun: Það getur verið erfitt í fyrstu að finna nákvæmlega út hversu oft eða mikið vatn Button fern kýs. En mælt er með að láta moldina þorna örlítið milli vökvana og ekki láta hana liggja lengi í mjög blautri mold. Hægt er að fylgjast með blöðunum á henni en ef þau lafa mikið þá er hún þyrst.Gott er að stinga puttanum örlítið ofaní moldina til að finna hvort hún þarfnist vatns eða ekki.

Stærð: Hún getur orðið 20-30 cm há og um 30 cm á breidd þannig hún er ekkert voðalega plássfrek.

Afleggjari: Þegar tekinn er afleggjari af Button fern þá er gott að taka mjög beittan hníf og skera smá part af plöntunni og koma svo fyrir í nýjum litlum potti.

Er hún eitruð: Button fern er ekki talin vera eitruð börnum og gæludýrum.

Ég vona að ég hafi ekki ruglað ykkur of mikið með mismunandi týpum af burknum en mér finnst þær bara svo ótrúlega skemmtilegar plöntur. og langaði að nefna mínar uppáhalds. Þær þurfa ekki allar eins umönnun og getur munað örlitlu milli þeirra einsog t.d með raka og annað.

Vonandi hafið þið gaman af þessum nýja lið hér á blogginu.

kær kveðja
Ágústa

/0 Comments/by

Planta vikunnar – String of hearts

Vegna mikilla fyrirspurna frá ykkur varðandi hinar og þessar plöntur þá ákvað ég að bæta við þessum lið hérna á bloggið sem ber heitið planta vikunnar.  Ég mun taka fyrir eina plöntu í hverri viku og skella hér inn upplýsingum um hana. Vona að þið takið þessum nýja lið hér á blogginu með bros á vör og mun ég reyna mitt besta við að halda honum á lofti.

Að þessu sinni ætla ég að fjalla örlítið um String of hearts (Ceropegia woodii)

Hengiplöntur eru að koma sterkt inn og er string of hearts er ein af þeim. Þessi fallega planta kannast eflaust margir við, en hún var tíð í húsum hjá ömmum og öfum hér í gamla daga.

Tegund: String of hearts er ein tegund þykkblöðungs, þær eiga uppruna sinn að rekja til Suður Afríku og Zimbabwe, en þykkblöðungar þurfa ekki mjög mikla vökvun vegna þess að þeir eru duglegir að geyma vatn í blöðunum. Ég hef séð þá dökkgræna með smá fjólubláu undir blöðunum en svo rakst ég á einn þegar ég var stödd í Plantorama í Danmörku um daginn með hvítum og grænum blöðum og örlitlu bleiku í. Þannig að þeir koma greinilega í margskonar litaafbrigðum.

Birta: String of hearts vill mikið sólarljós en einsog með flestar plöntur er ekki gott að láta þær standa í mjög mikilli sól á heitum sumardögum í stofuglugganum.
Þegar plantan fær mjög góða umönnun þá verðlaunar hún manni og gefur af sér falleg fjólublá blóm.

Staðsetning: hún nýtur sín best í hillu á veggnum eða í hangandi blómapott.

Vökvun: Leyfið moldinni að þorna nokkuð vel milli vökvunar. En hún þarf tíðari vökvun á sumrin vegna hitans og breytingu á loftinu inni hjá okkur.

Stærð: Hún verður um 10 cm á hæð og getur orðið alt að 2-3 metrar á lengd.

Afleggjari Lítið mál er að taka afleggjara af string of hearts, og er í raun talin auðveldasta plantan til þess. En þegar hún er orðin frekar löng og þig langar að klippa smá af henni, þá er tilvalið að setja 3-4 stöngla saman í vatn í örfáa daga og setja síðan í lítinn pott með vikur í botninum og mold sem er góð fyrir kaktus en ég hef séð þá mold í t.d garðheimum.

Er hún eitruð: String of hearts er ekki talin eitruð börnum og gæludýrum.

helstu blómabúðir landsins eiga hana oft til hjá sér, þið þekkið hana á hjartalaga blöðunum. Núna eru einmitt plönturnar að tínast í búðirnar eftir jólatörnina, Nóg úrval og gaman að sjá hversu margar skemmtilegar tegundir eru að koma.

Kær kveðja
Ágústa

/0 Comments/by

Plöntuspjall

Ég man þegar ég var lítil stelpa og stofugluggarnir heima voru fullir af allskyns plöntum. Mamma fékk sér oft kaffi um helgar og hellti restinni úr bollanum stundum í pottinn hjá plöntunum. Mér fannst það stundum mjög skrýtið, en það er víst góð næring í kaffinu fyrir plönturnar. Ég man oft eftir því að hafa legið á stofugólfinu heima með fullt af litum og pappír og teiknaði öll skemmtilegu blómin og litlu hlutina heima í stofu.

Mánagull er einstaklega skemmtileg hengiplanta sem auðvelt er að viðhalda.

Ég er alveg viss um að ég hafi blómaáhugann frá henni móður minni. En það er þó ekki nema sirka 7 ár síðan ég fór að hafa verulega mikinn áhuga á þeim og fræðast mikið um blóm. Ég byrjaði svo að kaupa mér eina og eina plöntu og eru þær hátt í 20 talsins núna. En það er svo gaman hversu ólíkar þær eru og sjá þær vaxa og dafna. Svo auðvitað hefur maður lent í að einhverjar þeirra deyji líka. Ég hef tekið með mér plöntur heim frá útlöndum, sem er svo gaman þá fylgir þeim svo skemmtileg saga.

String of hearts er ákaflega falleg hengiplanta með hjartalaga blöð. Hún er í raun þykkblöðungur og þarf ekki mjög mikla vökvun.

Um daginn sýndi ég frá plöntum sem ég kom með heim frá Danmörku, en þeir sem hafa áhuga getið fylgst með islenskheimili á snapchat. Þar sýni ég reglulega frá plöntum, heimilinu, eldamennsku o.fl

En ef þú ert í plöntuhugleiðingum þá er gott að hafa í huga að ekki allar plöntur eru öruggar í kringum börn og gæludýr. Því oftar en ekki eru blöðin eitruð. Mér fannst mjög áhugavert að vita það afhverju sumar plöntur eru eitraðari en aðrar, en það er vegna þess að margar plöntur hreinsa loftið inni hjá okkur og taka óæskileg eiturefni úr loftinu sem koma með efni í húsgögnum, málningu, reykingalykt, myglusvepp o.þ.h Efnin fara í plöntur og þar á meðal blöðin og þegar gæludýrið þitt nartar í blöðin þá verður það fyrir eitrun sem er af völdum þessara efna. Og gæludýrið getur orðið mjög veikt.

Þegar ég uppgötvaði þetta þá fannst mér þetta alveg magnað og þykir enn. Þannig ef þú vilt bæta loftgæðin inni hjá þér þá er um að gera að sanka að sér nógu mörgum plöntum, en ef að þú ert með litla óvita eða gæludýr þá er gott að staðsetja plöntuna þar sem þau ná ekki til.

Svo er einnig ráðlagt að strjúka rykið sem myndast á blöðunum á plöntunum í burtu eða einfaldlega spúla yfir þær í sturtunni með vatni. Því þegar blöðin eru hrein á plöntunum þá vinna þær betur við að hreinsa loftið inni hjá þér og það auðveldar þeim að stækka og líða vel.

Monstera eða rifblaðka er ákaflega vinsæl og þarf hún gott pláss því hún getur orðið mjög plássfrek.

Svo langar mig líka að tala aðeins um vökvun á plöntum. Því oft er talað um að vökva eigi einu sinni í viku eða jafnvel sjaldnar. En gott er að hafa í huga að ekki er eins loft inni hjá okkur öllum. Hjá sumum er loftið þurrara eða meiri raki hjá öðrum.

Svo eru sumar plöntur sem þurfa bara meiri vökvun og hjá öðrum má líða lengri tími. Mér finnst góð regla að athuga frekar hvernig moldin lítur út hjá plöntunum. Gott er að stinga puttanum örlítið niður í moldina sirka 1 cm. Ef hún er mjög þurr þá er gott að vökva. En ef hún er enn frekar rök þá þarf ekki að vökva strax.

Best er að vökva í undirskálina og hafa pottinn með götum að neðan. Þannig að plantan taki vatnið upp í ræturnar. Stundum þegar vökvað er of mikið í moldina þá fara að koma litlar flugur sem geta pirrað mann mikið. Til eru ýmis ráð við þessum flugum en það sem hefur virkað best fyrir mig er að blanda grænsápu og vatn saman í vatnsbrúsa og úða í moldina í nokkra daga þar til þær hverfa.

Ég vona að þessi ráð komi ykkur að góðum notum. Næst skulum við skoða umpottun blóma betur og hvaða plöntur henta þeim sem eru að hefja sín fyrstu plöntukaup.

Kær kveðja
Ágústa

/2 Comments/by